بعد أيام يحل اليوم الأول من العام الدراسي الجامعي الجديد، هذا اليوم يكون له مذاق مختلف عند طلبة سنة أولى جامعة، حيث ينتقل الطلاب من مقاعد الفصول إلى مدرجات الجامعات، ويسعى العديد من الطلاب إلى البحث عن نصائح وإرشادات قبل حلول الدراسة لتجنب الإخفاق خلال فترة الدراسة الجامعية.
- قدم العديد من الخبراء بعض النصائح لطلاب الفرقة الأولى، منها :
1ـ خصص أول أسبوع دراسي لإدراك الواقع الجديد والمرحلة العلمية التي دخلتها، وتعرف على زملاء أكبر منك وفي سنوات دراسية سابقة، لأنهم سيساعدونك على فهم الأمور بسرعة، ويوضحون لك طبيعة كل مادة وعادات وأساليب الأساتذة وطبيعة كل منهم في شرح مادته، مما يساعدك على التأقلم على الوضع الجديد سريعا.
2ـ احرص على الحصول على القدر الكافي من النوم والساعات التي تحتاج إليها قبل البدء في الدراسة، وتحديد موعد ثابت للاستيقاظ كل يوم للحفاظ على الذهاب في موعدك والإلتزام بالجدول الجامعي، لأن ذلك سيساعدك على زيادة نشاطك لكي تتمكن من الحصول على المزيد من التفوق في الدراسة.
3ـ حاول أن تتناول الأكل الصحي، ويمكن أن يكون ذلك من الصعب تحقيقه نظرا لصعوبة الحصول على "السندوتشات" التي كانت تعدها الأم سابقا، ولكن حاول الحصول على قدر كاف من الأكل الصحي ليساعدك على البقاء في صحة جيدة وتعطيك الطاقة لبدء مجهود لمرحلة دراسية جديدة، وأيضا عليك بالإلتزام بممارسة بعض التمارين الرياضية لأنه من شأنها أن تساعدك على مواصلة التركيز والنشاط والذهني المطلوب.
4ـ حاول من أول يوم لك في الجامعة انتقاء الصديق الذي ترى فيه إمكانية مساعدتك على التفوق في الجامعة، وحاول أن يكون على نفس الدرجة العلمية، وفي ذات الوقت يضمن لك الاستمتاع بالحياة الجامعية بكل ما يميزها.
5ـ حاول تنظيم وقت الراحة الذي ستحصل عليه بين كل محاضرة في الجامعة، لأن ذلك سيساعدك على الخروج من جو المحاضرة السابقة ويشعرك بأنك تبدأ يومك من جديد بنشاط.
6ـ عليك الإلتزام بحضور المحاضرات، وعدم الاعتماد على المحاضرات النهائية في الفصل الدراسي، وكن ضمن صفوف المجموعة المشاركة في المناقشات مع الأساتذة الجامعيين أثناء المحاضرة لأن ذلك سيساعدك على استيعاب المنهج بسهولة.
7ـ حالما تشعر بأنك لست مستوعبا لكل ما تتلاقاه من مناهج على يد الأساتذة الجامعيين، فإن ذلك الشعور لن ينتابك وحدك وإنما لكل زملائك من نفس العام، وفي هذه الحالة عليك إعادة قراءة مذكرات المحاضرات، وحاول مع أصدقائك الجدد استيعاب ما قام الدكتور بشرحه سويا ولا تنتظر حتى نهاية الفصل الدراسي لمحاولة فهم المنهج كله، فإن في هذه الحالة سيكون عليك استيعاب كل هذا الكم مرة واحدة.
وفيما يتعلق بنصائح الطلاب السابقين، كانت نصائحهم لا تخلوا من مواقف كوميدية :
- "ليلى رشوان" :"ذاكروا اللى الدكتور حدده، وأهم حاجة الملغي علشان هو اللى بييجي فى الامتحان".
- أحمد عبدالرازق :"بالنسبة للي داخلين كليات عملية ، بعد اسبوعين تلاتة صدقني هتمتحن اكتر ما بتستحمى، واعرف شلتك كدة من اولها عشان دول رفاق العناء، واخترلك مكان كويس في آخر بنش في المدرج لزوم النوم والانتخة عشان مش هتفضي تنام من البلايستيشن".
وتقول نجلاء :"مذاكرة الجامعه غير مذاكرة ثانوى وطبعا المناهج والدكاترة كمان لو عاوز ترتب فعلا او تجيب تقدير مش حاجه صعبه خالص ف حاجات لازم تعرفها بس:

- طبيعه المواد والداتا يكون معاك كل المحاضرات سواء تسجيلات او نوتس بتاخدها ف المحاضرة او بوربوينت او كتب وورق

-هتواجهك مشاكل زى ان مثلا يكون ف مصطلحات جديدة ف المواد او اللغة متقفش عندها وخليك مرن يعنى كلنا كنا كدا

- درجات المادة ماشية ازاى فى ميدتيرم مثلا واعمال سنه ودرجات غياب وسكشن وفاينال تهتم بيهم كلهم ع اد ما تقدر

- اعمال السنه هيكون فيها تكليفات مثلا او عملى متخافش انك تجرب وادخل ع النت وشوف واتعلم واسال الناس الى جربت

ولو ساعات معتمده وعاوز ال gpa بتاعك يبقي 4 لازم تجيب ف كل مادة امتياز

لو جبت ف التوتال امتياز وف مادة واحده بس الامتياز راح منك بتنزل عن 4

- تبقي فاهم الدكتور كويس ايه طريقة تسال الدفعات الاكبر طبيعه الامتحانات والمعامله بتاعته بيهتم بالغياب ولا لا

- المذاكرة بقي لو ف كليه طبيه او عمليه بتحتاج تبقي فاهم الدنيا اول باول لو موادك كلها حفظ فانت لو عملت الحاجت الى فوق دى وجيت قبل الامتحانات لميت المواد هتلاقيها سهلة جدا وهتقفل ان شاء الله

-ابعد عن الحاجات الى بتعطلك عن الدراسه يعنى خلى ليها اولويه

واسال دايما الى اكبر منك واختيار ناس جايبه تقدير او مرتبه اسالهم متروحش تسال حد يحبطك.
- أحمد عبده :"هتدخل الجامعة يبقى تنسى جو الاستاذ اللي في أيده الغياب واعمال السنه وخلصت وهتدخل على رئيس جمهوريه مادته دكتور الجامعه اللي ممكن تشوفه بعبع وبايدك برضو تكسبه بشوية حاجات صغيرين.. يعني متتعاملش مع الدكتور على انه مدرس وخصوصا لو انت في سنه اولى علشان ميحرجكش ويقولك انت مش في الفصل هنا اكبر بقى فاوعى مثلا تاكل قدامه بدل ما يظبطك.
ويضيف:الدكتور اللي هتدخله اول محاضره وهتشوفه قافش وبزعق دا ممكن يطلع عسليه وبيساعد الطلبه فانت شوف هو بيضايق من ايه ومتعملوش وشوف بيحب ايه وتعمله علشان هتكسبه وممكن تبقو اصحاب.. لو اتناقشت معاه في حاجه والحوار بينكم سخن وحسيته هيقفش متعاملوش ند بند وكانه صاحبك لا حاول تمتص غضبه وتتعامل بعاه بود وتهدي الموضوع وتعامله بكل احترام بدل ما تلاقي نفسك مفصول
ونابع: اتناقش مع الدكتور وخليك متفاعل ومتقعدش ساكت ولو طلب تكليف زي بحث او شيت خليك من اول الناس اللي هيسلموه علشان ياخد عنك انطباع كويس ويحترمك وهتلاقيه من نفسه بيساعدك.
وختم: بس خد بالك بقى اوعى تفتكر انك تناقشه انك تبقى ملح الحكاية دي بالذات"بتجننه يا طه" فلو عندك استفسار ولا طلب ولقيته رفض او مرضيش يتكلم متلحش عليه بدل ما تلاقي نتائج عكسية.
- سمير وجيه :"طلبة سنة أولى أكيد لما بتتكلم مع أي حد بيقعد يفتي ويقولك ماكنتش بحضر لا الكلام دا بح لان فيه نظام مطبق في بعض الكليات بيجبرك على الحضور اسمه الساعات المعتمدة.. دا نظام من خلاله بتسجل المواد اللي بتدرسها ف الترم منهم مواد اجباري عليك ومنهم اختيارية بترجع لرعبتك.
كمان بتقدر تدرس العدد اللي عاوزة من المواد يعني ممكن لو انت عندك ظروف ومقرر عليك في الترم 7 مواد ممكن تأخد منهم أربعه وتأجل 3 مواد.. لو انت جايب مقبول في مادة وعاوز تحسن تقدريك فيها بتدرسها تاني عادي، بس علشان تنجح لازم كل مادة انت مسجلها او مختارها بتحضر فيها عدد من الساعات محدد لو أقل هاتشيل المادة يامعلم".
- سخر بعض الطلاب من بداية العام الدراسي من خلال مشاركتهم بتعليقات كوميدية :
وتداول رواد موقع التواصل الاجتماعي "فيس بوك" ، "كوميكسات" ، ساخرة من الدراسة الجامعية.