أكد الإعلامي خيري رمضان إن لديه 7 أشقاء، ووالده فني تحاليل طبية، مضيفًا: “طبعًا أكبر حد من وجهة نظر والدي في المجال هو الدكتور، فكان عايزني أطلع دكتور، وأحفاده طلعوا دكاترة، لكن مفيش حد من ولاده، وكان حاطط أمل عليا عشان كنت شاطر أوي في الدراسة لحد مرحلة ما، وكان بيتفائل بيا في أي حاجة وبيحس إني وش الخير”.
وأضاف خلال لقائه مع الإعلامية إسعاد يونس ببرنامج «صاحبة السعادة» المذاع على فضائية «CBC»: “خذلته في الثانوية العامة لأن مكنش طموحي أبقى دكتور، مبحبش الطب، وكنت غاوي كورة، رسبت في الثانوية وده عشان أنا مصمم ألعب في الأهلي وهو مصمم أبقى دكتور، اتصدم لدرجة أنه وقع وجاله نزيف في المخ”.
وتابع: “أسرتى من منية النصر، التابعة لمحافظة الدقهلية، ولما أبويا طلع على المعاش أقنعته هو وأمي ييجوا هنا في القاهرة يعيشوا معانا أنا وأخواتي، وفعلًا حضر وأقنعته بإنشاء مشروع صغير”.