الكثيرون يعشقون شرب الشاى بلبن لطعمه المميز، وربما يعود ذلك لكثرة التعود عليه صباحا، ولكن يتحول الأمر بعد ذلك إلى أمر اعتيادي طوال اليوم، حتي يتحول الشخص إلى مدمن شاى بلبن فهو يعتبره ضمن وجباته اليومية.. صفحة «خمسة بلس حاجات» نشرت تقريرا عن مدمني الشاى بلبن الذين زاد انتشارهم كثيرا فى المجتمع، ووضعت 8 أشياء طريفة فى قالب ساخر تميز عشاق ومدمني الشاى بلبن الذي يعتبرونه جرعة سعادة فى حياتهم .

- إذا دخلت مع مدمن الشاى بلبن أي كافيه ما تستغربش أنه هيسيب اللاتيه والكابتشينو والماكياتو ويطلب شاى بلبن، وده على فكرة من أغلي مكان لأرخص مكان، ما بيفرقش معاه «الشاى بلبن مافيش غيره» .

- النوع ده من الناس لما بيضايق أو بيصدع أو حتي الغدا بيتأخر عليه بيقوم يعمل شاى بلبن «جعان يا أخي» .

- لو اشخص ده ترك الشاى بلبن يبرد وقام يرد عليكي «اتجوزيه وش» .

- لو بنت من مدمني الشاى بلبن قالتلك أنك أغلي حاجة عندها اتمسك بيها جدا لأنها ضحت «بالبرنس عشانك يا أخي» .

- مدمني الشاي بلبن لما بيزعلوا منكوا ممكن ما تصالحهومش عادي، أنت بس أعملهم كوباية شاى بلبن مضبوطة كده وهما هيسامحوك على أى حاجة .

- الشاى بلبن يعتبر من الحاجات اللي ناس كتير بتصحي من نومها علشانه .. «ما تستقلش بيه ده جامد أوي على فكرة » .

- ساندوتش الجبنة الرومي مع كوباية الشاي بلبن الصبح، أحلي من التوست بالجبنة الريكفورد ومج الهوت شوكلت عند الناس دي .

- لو عندك مشكلة ومتضايق وتعبان وبتحكي مأساتك للشخص المدمن ده هيرد عليك بحاجة واحدة «خد دش وأشرب شاى بلبن وأنت هتبقي أحسن» .. ما تستغربش هو كده كويس .