غفير القصر أهم من الملك والقصر والحاشية. .
بيتغيّر عليه وزرا. . ويتغير عليه دواوين. .
وهو الشاهد الأوحد على الأحداث
هو اللى ف إيديه العد.. وهو اللى ف إيديه الحصر..
هو مراية التواريخ.. وهو فيلسوف العصر
وانت الفارس الخيبان
لما الدنيا ضاقت بيك.. طلِعت جبان. .
هِرِبت ف قطر أحلامك وسِبت البيت. .
أميرة القصر ضحكت لك.. رميت اللى ف إيديك وجريت. .
يا واد اللى ف إيديك كان نور. .
أميرة القصر مش أحلى بنات الحور
ولا انت الفارس الأوحد ولا الددبان..
وسور القصر طول عمره بيتفرج على الفرسان
بييجوا كل يوم يتلمّوا برّا الخط. .
وعمر ما حد فيهم فكر انه ينُط. .
يباتوا زى ما يباتوا. . يهاتوا زى ما يهاتوا. .
ويركع تحت رجليها ويوهب عمره وحياته. .
وبرضه تقول له مش عايزاك
لو حبَّك غفير القصر كان عدَّاك
كان ودَّاك لبلكونة الأميرة تشوف. .
من جوّا بيبقى اللعب ع المكشوف
وتحفظها. . وترسمها. . وتكتبها. .
حتقول ان انت اللى اعتليت السور
وجعت شهور. . وعمت بحور. . عشان توصل لأحلامك. .
ساعتها الناس حتمشى وراك وحتأمن على كلامك. .
وبالنسبة لغفير القصر. . يتغيّر
زهقنا خلاص من العواجيز. . نشوف لك شاب وصغير. .
عشان يتربى على إيدك. .
يا فاكر غربتك عيدك. .
مفيش فى الغربة غير سهرك. .
ولا تغرّكش أنوارها. . دى غربة تقيلة وبخيلة. .
حتنهش لحم أيامك وتدّيك خيرها بالتيلة. .
مفيش فى الغربة يا ابن الغربة غير الزيف. .
فى وقت السرقة ليه يا اهبل عملت شريف ؟؟
وِرِثت من امك الإخلاص ؟؟
يا ولد الناظرة مش كل الخدود تتباس
بتعافر لوحدك ضد جهل الناس. . وكره الناس. .
وعايش الغربة بتدور على سندك. .
لو حبَّك غفير القصر كان نجدك. .
كان عدلك على القبلة وردَّك فى الآيات السهو. .
كان عدّاك من السراديب عشان توصل لباب البهو
. . وتتملا فى نور الذكر والحضرة كما الدراويش. .
مفيش مليم بييجى يا ولدى م السرقة وخيره يعيش. .
صلاتك باطلة يا ابن الناظرة وصيامك فطور مبتور. .
وساعة السيف ما يطلع يا ابنى. .
كل الناس حتشهد زور
يا شادد بؤجتك فى إديك على بوارج
خلاص بطلت حكاية عقد فى الخارج. .
حبيبتك مش حتستناك. .
لو حبّك غفير القصر كان ادَّاك. .
مش كل الكلام يتقال ومش كل الودان تسمع. .
ولو مجبور على العيبة نصيحة منى تستمتع. .
غفير القصر مش حيهددك بالسر. .
حتفضل تور فى ساقية غربتك بتدور محلّك سر. .
سنين عمرك حتفرُط تحت عقب الباب. .
وتصحى فجأة فتلاقى ان شعرك شاب. .
وحتحن لزمان فايت. .
طعم الفرح مهما بيحلا فى الغربة. . طبيخ بايت
ووجع الغربة زى الدبش
يا واد اللى ماداقش الغربة ما تأدّبش. .
أنا الهربان من الخولى ومن غفري
وانا اللى ببات على عرقى وعلى عفرى. .
غريب ومعاه جواز سفرى. .
ومش عاجبه. .
انا المصرى اللى علّمته بقى بيرفع لى فى حواجبه
أنا المصرى اللى علّم أمتين تقرا. .
بقيت واقف طابور بالدور عشان اختم ورق هجرة. .
غفير القصر لمّا ضحكت ماعجِبهوش
لما زعلت ما عجبهوش
لما سكت ما عجبهوش. .
لما نطقت ما عجبهوش
قال لى تجيب لى أوراقك وأحلامك ودمغة وحسن سير وسلوك
وقبل الكل هات لى لسانك المبرد يقف ويقول انا صعلوك
ساعتها انا قلت : ماعجبهوش
يا مهاجر وسايب حلمها يدبل
صرمت الناقة لحسن فى الحرام تِحبَل
وتُهت ف غربتك والنوم. .
قضيت العمر عَد نجوم. .
دى مش نفس النجوم يا اهبل. .
دى مش نفس السنين والعمر. .
انا عارفك مشيت مغصوب ودايق المر
لو بيدى لالمّ لك بيوت الحى والونسة
واجيب لك كل أحلامك فى خيط معقود. .
عيالك لما بتسافر بيبقى اسمهم ورثة
مفيش فلاح حتطرح أرضه عز وهو مش موجود. .
غفير القصر غرّربنا عقود وعقود. .
بقينا مقطوعين الإيد. .
ومش ذنبى انى حبيتك عشان ترمينى للمطاريد
واعيش العمر بتمنّاكى فى الأحلام. .
أزورك أسبوعين فى العام. .
واشم هواكى فى الأفلام واحوّش نهرك الغالي
واقول معلش بكرة ارجع والاقى حبيبتى لابسة لي
وطبل وزمر وقرايب وهيصة وزينة بتلالي
أتارى العمر بيعدى كلام فى كلام. .
يا بياع السنين قل لى أجيبها بكام. ..
غفير القصر بيبيع ابتساماته. .
وبيوزّع على اللى مصدقين غِشه
مابنحسّش فى وقت الغربة مين ماتوا. .
ونحسد كل ميت مات على فرشه. .
يعدى الموت على غفر القصور بالدور ما يوعظها. .
ويرمونا فى ليل الغربة والتشريدة والمنفى
ليالى تمر ولا حدّش من النايمين ملاحظها. .
وابات فى الغربة انا سقعان وغيرى ف بيتى يتدفّى. .
أنا من الناس لو غضبت بتفلت منها ملافظها. .
وغضب الغربة شارب دمى ما استرجع ولا استكفى
ولا انتم حِمل غضب الناس ولا انتم حِمل سيل غيظها
ولا اتعلمتوا من الأيام وم الدوران وم اللفة. .
فى الآخر مصيركم تيجيوا نفس الشلة وبتظهر ساعتها الشمس والحق اللى بات ضعفان بيستعفى. .
ساعتها ننصب الزفة. .
ويرجع مُهرنا الحَرْنان. .
وننسى ان احنا كنا زمان
بنهجر مصر. .
عشان ماعرفش يفهمنا. . غفير القصر