ارتفاع الأسعار يشعل غضب الدقهلاوية.. أزمة السكر والكهرباء تتصدر المشهد.. ربة منزل: الدولار رفع سعر الخضراوات.. ومهندس: باستخبى من محصل الكهربا كل شهر .. فيديو

سادت حالة من الغضب لدى عدد كبير من أبناء الدقهلية بسبب نقص السكر فى الجمعيات وكذلك ارتفاع الاسعار ليس للمواد الغذائية فقط بل لفواتير الكهرباء والمياه مع ضعف وثبات الأجور منذ سنوات.

يقول "وائل ابراهيم" مواطن بالدقهلية: الاسعار ولعت، حرام كده احنا عايزين بلدنا تبقى احسن بلد مش ترجع لورا تاني، الاسعار فى الأكل والشرب وفواتير الكهربا نار ، انا معنديش تكييف ومعظم الوقت يجيلى فاتورة شهريا بـ300 جنيه.

فيما قال الحاج محمد "سائق" : انا سواق تاكسي ، كنت سواق فى مؤسسة من المؤسسات الحكومية وطلعت معاش وباخد 500 جنيه ، وساكن فى شقة صغيرة وبدفع كهربا 150 جنيه ، ولسه عندى ولد فى الجامعة وولد فى الاعدادى وبنت على وش جواز "يرضى مين ده" !.

أما "منى فاضل" ربة منزل فتقول: "كل يوم مبقاش غير الكلام عن الدولار والجنيه ، كل ما اشترى حاجة الاقيها غليت أكلم بتاع الخضراوات يقولى الدولار غالي، وأضافت: "انا عندى ثلاثة اولاد كلهم فى التعليم وابوهم إدارى على قده حرام الاسعار دى والسكر كمان وصل لـ8 جنيه ومش لاقيينه فى المجمعات".

فيما قال المهندس "احمد": انا كنت مهندس فى الكهرباء مرتبى كان 5 الاف جنيه ، طلعت معاش ولسه عندى أبناء فى الجامعة، اعمل ايه بمعاشي دلوقتي ، فاتورة الكهربا بتيجى باستخبى من المحصل لما ينادى عليّ، مفيش فلوس بتكفى والمسئولين هنا رايحين جايين بس يتصوروا ، لكن حد يشوف الاسعار دى ويضبط تجار السوق السودا لا ، المسئول اللى مش قد الكرسى يسيبه، ياريس طهرنا من اللى بيوقعوا فى مصر، ياريس نفسى صوتى يوصلك".

أضف تعليق